Филмот „Преекспонирано“ во режија на Елеонора Венинова ќе ја има својата азиска премиера на Меѓународниот филмски фестивал во Пуна, Индија. Филмот чиј англиски наслов е Things Unsaid е меѓу специјално избраните најдобри филмови од целиот свет во селекцијата „Глобално кино“ 21. издание на фестивалот.
Ова ќе биде прва премиера на азискиот континент, а фестивалот ќе трае до 9 февруари. Светската премиера на филмот „Преекспонирано“ се случи на А-фестивал во официјална конкуренција на Меѓународниот филмски фестивал во Каиро, кој се одржа во ноември, минатата година.
Улогите ги толкуваат: Камка Тоциновски, Благој Веселинов, Сара Климоска. Кинематографер е Лев Предан Коварски, музиката е на Линдзи Рајт, сценографијата на Срѓан Митровиќ, сценариото на Венинова, монтажер е Гоце Кралевски, а костимите се на Жаклина Крстевска. Филмот е во продукција на ДНФ Филмс и Гоце Кралевски, во копродукција со „Лилит“ од Србија.
